परेशान होकर ताऊ बना डकैत !

बात ऐसी हुई की उन दिनों म्ह ताऊ बेरोजगार घुम्या करै था ! घर म्ह भी किम्मै सामान पतर की तंगाई चल्या करै थी ! हालत किम्मै ज्यादा ही नाजुक हो लिए तो ताऊ नै तय कर लिया की इब आत्महत्या कर ली जावै तो ही घणी आछी बात सै !
सो ताऊ नै ये सोचकै एक मोटा सा रस्सा लिया और अपणा लट्ठ उठाकै चल दिया अपने कुए पर ! ताऊ का प्रोग्राम कुए पर जाकर वहाँ पीपल कै पेड़ तैं लटकने का था !  बस आज ताऊ जीवन लीला समाप्त करण आला था ! क्योंकि ताऊ हर काम मेहनत और इमानदारी से करता था ! फ़िर भी उसकी ये हालत थी तो क्या करता ? वैसे आजकल हर इमानदार  और मेहनती आदमी को सिवाए आत्महत्या के कोई चारा नही  दीखता !

 

रास्ते म्ह उसको एक डाकुओं आली  हिन्दी पिक्चर की याद आगई ! और ताऊ का दिमाग घूम गया ! ताऊ नै सोची की मरने में कितनी तकलीफ होगी ? और इससे अच्छा तो ये है की अपन तो डकैती शुरू कर देते हैं ! आज कै जमानै म्ह इसतैं बढिया और कोई बिजनस भी ना दिखै ! यो सुसरे सारे ही तो डकैती करण लाग रे सें अगर ताऊ भी टाबरां ( बच्चों ) खातर कर लेगा तो कुण सी आफत आज्यागी ? और ताऊ नै  इन की तरियां कोई उम्र भर तो करणी नही सै डकैती ! १० / २० बड़े हाथ मार कै इस धंधे नै जैरामजी की कर देगा ! तो अब ताऊ नै मरणा केंसिल कर दिया और शाम होण का इंतजार करण लाग गया !

 

जैसे ही थोडा अँधेरा हुवा  की  , ताऊ तो अपणा लट्ठ उठाकै गाम कै बाहर चल दिया ! शहर की तरफ़ जाण आले रास्ते म्ह उसको गाम का बाणियां मिलग्या !  गाम का बाणियां शहर में अपणा गल्ला आदि बेचकै वापस आवै था ! इब ताऊ और बाणीये
की राम राम श्याम श्याम हुई !

बाणीये नै आश्चर्य तैं पूछ्या -- ताऊ इस बख्त थम इत के करण लाग रे हो ?
इब ताऊ बोल्या - रे बाणीये के , सुन मेरी बात ! मैं बेरोजगारी तैं हो राख्या सूं घणा तंग ! खेताँ म्ह फसल किम्मै हुई नही सै ! सो भूखे मरण की नौबत आ री सै ! सो आज और इब्बी  तैं मन्नै  इमानदारी तैं डकैती का धंधा शुरू कर दिया सै ! और भाई इब आज शुरुआत थारे तैं ही करणी पड़ री सै ! सो आज मैं तन्नै लुटुन्गा !

 

इब बाणीये नै ताऊ की बात सुणी तो उसकी तो हवा निकल गई ! क्योंकि वो शहर से गल्ला बेचकर बहुत सारे नोट लाया था !  इब बाणीये चालाक तो होवें ही सै ! उसनै ताऊ को खुशामदी लहजे में कहा -- अरे चौधरी साब ! थम भी के कर रे हो ?  अरे ये सारे नोट थारे ही तो सें ! ल्यो थम पकडो इस थैली को ! मैंने राखे या आपने राखे , एक ही बात सै !

 

इब ताऊ बोल्या-- देख रे बाणीये के ! मेरी बात सुण ! मैं सब काम इमानदारी तैं करया करू सूँ ! तेरी मेरी छोड़ ! और तैयार होज्या लुटण खातर ! और मैं तेरे तैं कोई भीख नही लेन्दा  ! समझया नै ? मैं तो हर काम मेहनत और इमानदारी तैं करया करूँ सूं ! इब डकैती का धंधा करया सै तो वो भी इमानदारी तैं ही करूंगा ! और ताऊ नै पहले तो बनिए को उठाकर पटका ! फ़िर उसके सारे नोट छीन लिए ! उसके बाद उठाके ५/७ लट्ठ मारे ! और बोला - देख यो होवे सै डकैती करणा तो !