रमलू, कमलू और शमलू के कारनामे

भाई आज थमनै हम ताई पताशी के किस्से सुनावान्गे
बात न्यूं हुई थी की ताई का आदमी यानी घर आला
ताऊ रक्खेराम कमाने के लिए मण्डी गोविन्दगढ़ गया हुवा था !
और ताई के तीन छोरे थे और भई तीनों छोरे एक नंबर के
ऊत ( बिगडे ) थे ! एक का नाम रमलू , दूसरा कमलू और
तीसरे का नाम था शमलू ! अण तीन्युं उतों ने ताई का जीणा
हराम कर रखा था !

ताई पताशी अण बालकां कै लिए रोज हरी सब्जी, दूध, दही
जैसी गुन कारी चीजें खिलाया करती पर अण तिनु उत छोरों को
ये आछे ना लाग्या करते ! इनको तो पिज्जा बर्गर मुंह लाग
रे थे ! शाम नै रोटी खाण कै बख्त ये छोरे माच खड़े हुए और
बोले हम ना खाते यो हरा साग ! ताई बोली -- अरे छोरो मैं
इतनी मेहनत से यो साग खेता तैं ल्याकै बनाऊं सूँ ! थम खाते
क्यूँ नही हो ? छोरे बदमाश थे पक्के ! बोले -- हरा साग बनाण
की किम्मै जरुरत ही कोनी ! हमनै लेके खेत म चली जाया कर !
और वहीं हमको चरा दिया कर ! ताई को गुस्सा आगया !
और लठ उठाकै उण कै पीछे दौडी पर छोरे हाथ नही आए
उसकै ! ताई उनको गालियाँ देके चुप होगई !

इब ये तिन्युं छोरे चले गए स्कुल ! और साब थोड़ी देर
मै वहाँ पर हालण (भूकंप) आ गया ! सब घर वगैरह गिर गए
और स्कुल की इमारत भी ढह (गिर) गई ! सब बाहर खड़े हो
गए ! इतनी देर मै ये ताई के तिन्युं उत छोरे रमलू, कमलू,
और समलू जोर जोर तैं रुक्के मार मार कै रोण लाग रे !
हैड मास्टर आया और इन को रोते देख कर वो समझा की स्कुल
की बिल्डिंग गिर गई और अब ये कहाँ पढेंगे ये सोच कर शायद
ये बच्चे रो रहे हैं ! सो मास्टर बोला- बच्चों रोवो मत !
मैं जल्दी ही स्कुल की नई बिल्डींग बनवा दूँगा !
तुम चिंता मत करो ! रमलू बोला- अजी मास्टर जी हम इस
लिए थोड़ी रोवैं सें की स्कुल की बिल्डिंग गिर गई !
ये तो भोत बढिया हुवा ! हम रोवैं तो इस लिए सें की
इस भूकंप मै एक भी मास्टर ना मरया ! अगर सारे मास्टर भी
मर लेते तो पढ़ने से पीछा ही छुट जाता ! मास्टर डंडा लेके
इनके पीछे दौडा पर ये उत तो नौ दौ ग्यारह हो लिए वहाँ तैं !

फ़िर कुछ दिन बाद इनका बापू रक्खेराम वापस आ गया !
ताई नै और मास्टर नै इन तिन्युं उतो की शिकायत करी तो
ताऊ रक्खे राम नै अण छोरों की खूब ठुकाई कर दी ! और ये
छोरे घर छोड्कै भाज लिए और शहर जाण आली बस मै बैठ लिए !

इब ये थे तो पक्के उत ! सो बस मै चढ्कै एक छोरी नै
परेशाण करण लाग गे ! भई उसी बस मै एक और ताई
बैठी थी ! उस ताई तैं अण छोरों की बदमाशी बर्दास्त ना
हुई तो ताई नै चिढ कै इस रमलू तैं पूछ्या - अरे ताऊ कित जावे सै ?
रमलू किम्मै चमक्या और किम्मै नी बोल्या ! ताई नै फ़िर पूछ्या
-- र ताऊ कित जावे सै ? रमलू नै सोच्या -- या ताई कम स
कम ५० वर्ष की हो री सै ! और मन्नै ताऊ ताऊ कहण लाग री सै !
छोरे नै किम्मै छोह (गुस्सा) आ गया ! पर फ़िर भी चुप रहा !
अब बस की दूसरी सवारियां भी इनके मजे लेने लग गई !

ताई नै फ़िर तैं पूछ्या-- अरे ताऊ बताता क्यूँ नही के तू कित जावे सै ?
भई छोरा किम्मै गुस्से में तो था ही इबकै खट तैं बोल्या - ताई जावे
तो मैं कित्तै और ही था पर इब सोचू के तेरे लिए एक छोरा ही देख आऊं
भई ताई नै आव देख्या ना ताव ! अण तिन्युं छोरां पकड़कै और
कुटण लाग गी और ताई कै देखम देख बस की बाक़ी छोरियां भी
इनको धोण लाग गी ! छोरे बोले --ताई.... इबकै छोड़ दे आयन्दा
ऐसी छेड़खानी बस में कभी नही करेंगे !

फ़िर ताई नै इनका नाम गाम पूछ्या तै ये छोरे बोले हम तो
घर तै भाज कै आए सें ! तब तो ताई नै इनकी और ठुकाई करी
और इनको इनके घर ले जाकै छोडकै आई !